Halina kayo at magtipon sa aking harapan. Maupo kayo at ako’y magsasalaysay ng dalawang kwento ng kababalaghan. Sindihan na ang kandila. At ipatong sa… sa… sino ba ang dapat na magdadala ng bungo, ha?

Bueno, narito ang unang kwentong pinamagatang…

BALETE DRIVE

Si Elaine ay isang maganda, matalino, at matagumpay na Account Executive sa isang malaking advertising company sa Ortigas. Bandang alas-nuwebe ng gabi, lulan ng kanyang magarang sasakyan, nagmamaneho si Elaine sa kahabaan ng Gilmore Avenue. Katatapos pa lang niyang maisara ang isang mahalaga at malaking business deal.

Patungo si Elaine sa kanilang tanggapan sa may Ortigas Avenue. Gabi na, subali’t kinakailangan niyang bumalik sa opisina. Sa kalayuan, namataan niya ang mabigat na traffic sa intersection. Umiwas ang dalaga at kinabig ang manibela patungong Balete Drive. Madilim ang kalsada at ang tanging liwanag ay nagmumula lamang sa kanyang sasakyan. Ipinasya ni Elaine na magmadali.

Tinawagan niya sa cellphone ang kanyang boss, “Sir, I’ll be a bit late… Yeah, heavy traffic e… Yup, I got the contract… I’ll be there in…”

Huli na nang mapansin ni Elaine ang pagtawid ng isang batang babae'ng may dalang bilao sa harap ng kanyang sasakyan. Nabundol niya ito at tumilapon.

Huminto si Elaine at lumabas ng sasakyan upang siyasatin ang bata. Hindi na kumikilos ang kawawang paslit. Nalito si Elaine, lalo pa nang makita niyang duguan ang ulo ng batang ngayo’y nakahandusay sa gilid ng daan.

Luminga-linga siya sa paligid. Napuna niyang walang tao. Samakatuwid, walang nakakita sa mga pangyayari.

Nagmadaling bumalik sa kanyang sasakyan si Elaine at mabilis siyang tumakas.

Sa kanyang pag-uwi ay balisang-balisa si Elaine. Kaya minabuti niyang balikan ang Balete Drive.

Maghahatinggabi na nang siya’y huminto sa pinangyarihan ng sakuna. Lumabas siya ng sasakyan at nilapitan ang lugar na alam niyang kinalalagyan ng batang nabundol niya kanina. Nagtaka siya. Dahil malinis ang kalsada na parang walang naganap na aksidente.

Sa pagtalikod ni Elaine upang bumalik sa kanyang sasakyan ay biglang bumulaga sa kanyang harapan ang isang babaeng nakaputi. Mahaba ang buhok nito at tila maputla ang kutis ng mukha. Napasigaw si Elaine at halos natabig ang bilaong dala-dala ng kaharap.

Nagsalita ang babeng nakaputi. Mababa at malamig ang boses nito at marahan ang pananalita.

“Ale, puto po. Pakyawin niyo na,” wika ng kaharap, “Kanina pa pong umaga kami naglalako ng anak ko.”

Kahit nagtataka si Elaine sa biglaang paglitaw ng babae ay minabuti niyang kumilos nang di-kahina-hinala.

“A, e… sige. Papakyawin ko na,” nalilito niyang sagot.

Nakangiting tumitig kay Elaine ang babaeng nakaputi, “Maraming salamat po, ale.”

“S-S-S-Sabi mo... kasama mo ang anak mo? N-N-N-Nasaan siya?” kabadong tanong ni Elaine.

“Bigla na lang pong nawala. Dito po siya nagawi kaninang alas-nuwebe.” malungkot na ungol ng babae.

Kinilabutan ang dalaga at pinagpawisan nang malapot! Kailangang makaalis na siya.

“Ah… ano… sige! Ibalot mo nang lahat yung tinda mo,” balisang sinabi ni Elaine habang nagmamadaling dumukot ng pera sa kanyang bag. “Etong 500 pesos,” abot niya sa kaharap, "Keep the change." Nang maibulsa ng babaeng nakaputi ang salapi ay dahan-dahan nitong binuksan ang takip ng dalang bilao.

Sa liwanag ng kanyang sasakyan sa gitna ng Balete Drive ay lumantad kay Elaine ang kahindik-hindik na katotohanan! At ang nakabibinging karimlan ay binasag ng isang malagim na pagtili ng dalaga!

Hindi puto…

Hindi puto ang laman ng bilao kundi…




BIBINGKA!


putek naman...!!!

---